गोरखा । राजनीति कहिलेकाहीँ आरोप–प्रत्यारोपको अदालतभन्दा पनि मनोविज्ञानको खेलजस्तो देखिन्छ। त्यसैको झल्को आइतबार गोरखामा देखियो, जहाँ पूर्वगृहमन्त्री सुधन गुरुङले आफ्नो भविष्यबारे दिएको संकेतले फेरि राजनीतिक हलचल बढाएको छ।

स्रोत नखुलेको सम्पत्तिको विषयमा छानबिनपछि गृहमन्त्री पदबाट बाहिरिएका गुरुङ अहिले फेरि त्यही मन्त्रालयतर्फ फर्किने सम्भावना खुला राख्दै देखिएका छन्। राष्ट्रिय स्वतन्त्र पार्टी (रास्वपा) को जिल्ला अधिवेशनलाई सम्बोधन गर्दै उनले आफूलाई दोषी नठहरिए पुनः जिम्मेवारी सम्हाल्न तयार रहेको संकेत गरे।

तर उनको भनाइ केवल पुनरागमनको संकेतमा मात्र सीमित रहेन। त्यससँगै उनले एउटा असामान्य आग्रह पनि राखे— यदि फेरि गृहमन्त्री बने भने सुरुका दुई महिना मन्त्रालयलाई ‘बधाई र फोटो संस्कार’ बाट टाढा राख्न।

“मलाई फेरि गृहमन्त्री बनाइयो भने, पहिलो दुई महिनासम्म बधाई दिन आउने र फोटो खिच्ने काम नगर्नुहोला,” गुरुङले भने।